THOMAS ALVA EDISON

 

THOMAS ALVA EDISON

 

HMING : Thomas Alva Edison

PIANNI : February 11, 1847

PIANNA HMUN : Milan, Ohio, U.S

PA HMING : Samuel Edison, Jr

NU HMING : Nancy Elliot Edison

THIHNI : October, 18, 1931

THIHNA HMUN : West Orange, New Jersey

WORLD RECORD : Thil hrang hrang 1,093 a hmuchhuak. Phonograph, Motion Picture Camera leh Electric Bulb te hi kan hriat tlángláwn tak an ni awm e.

 

Kan chaklohna leh hlawhchhamna lian ber chu beidawnna a ni a, hlawhtlinna kawng tha ber chu vawikhat chauh tihchhin zel hi a ni.

-         Thomas A. Edison

     Thomas Alva Edison chu an unau pasarih zinga naupang ber a ni a, vanduaithlak takin beng lamah harsatna a rawn nei chho ta hlauh mai a, nimahsela he a harsatna hian a hma hunah tumruhna a pe thung. A naupanlai hian a hrisello hle a, chutihrual chuan mi dílchhút tak a ni reuh bawk a, chu erawh a chhungte tan chuan thil buaithlakah a chan cháng a awm fo thin.

 

     Vawikhat chu Thomas-a chuan a nu hnenah Vatáwk leh Várak te hi engvanga an tui chunga thu thin nge an nih a zawt a, a nu chuan an tui a kéu theih nan a nih thu a lo hrilh ve mai bawk. Thomas-a chuan chutia Vatáwkin tui a awpkéu thei a nihchuan, amah pawhin a awpkéu ve theih a ring ta tlat pek a, an thenawmte chhékin chu a chhungte hriat loh chuan ava pan phei ta a. A chhungte chuan an zawng nasa viau mai a, an thenawmte chhékin an va en nák chuan Thomas-a ngei mai chuan artui chu a lo awp vúng mai a ni.

 

     Thomas-a chu school a kal ve a, nimahsela mi dílchhút tak a ni a, taksa lamah harsatna a neih bawk avang chuan enkawl a harsa chho hle pawh a ni maithei, zirtirtute pawh an mangang thin khawp mai. Nikhat chu school atanga a rawn haw chuan lehkhathawn pakhat hi a rawn háwn a, chu a lehkha chu a nu hnenah pein an zirtirtute hawntir a nih pawh a hrilh zung zung bawk; a nu chuan lehkha a han chhiar chu a mittui a luang nghal ngiai ngiai a, Thomas-a chuan hrethiamlo takin lehkhaah chuan eng nge inziak tih a nu a han zawh chuan, ‘I fapa hi a fing lutuk a, he school pawh hi atan chuan a te lutuk a ni; amah zirtir tur hian zirtirtu thiam leh tling tawk an awm lova, khawngaihin nangma’n lo zirtir mai ta che,’ tia a inziah thuin a nu’n a chhang ve mai bawk a, tichuan a nu enkawlna hnuaiah zirna chu a chhunzawm ve ta zel a ni.

 

   A nun hi a awlsam lo hle a, rimtaka hnathawh chu a tihtheihah ngaiin engahmah hlawhcham a tum ngai hauh lo. Kum 12 mi a rawn nih chuan chanchinbu a sem a, Rél-ah te thei a zuar pah bawk a, chutihrual chuan ama pualin chanchinbu, Grand Trunk Herald chu a print ve bawk thin.

 

     Kum a lo vei a, naupan tet atanga mi thil chík leh tumruh, thil engemaw tal hmuhchhuah tum tlat na na na chu a hlawhtling chho ta viau mai a, khawvelah a hming a lo thang ta hle mai bawk. Nikhat chu inchhungah thil hlui tawh tak hi a hmu fuh hlauh mai a, chu a thil hmuh chu a naupanlaia a nu hnena a pek lehkhathawn ngei mai kha a ni; a chhungah chuan eng nge inziak chiah hriat tuma a han en nák chuan mak a ti kher mai, ‘I fapa hi rilru lama harsatna nei a ni a, he school-ah hian a kal zel a rem tawh lovang’ tih hi a lo inziak a, a mitthlaah chuan a nu a rawn lang nghal uai uai a, a nu hmangaihna leh fuihna chu a tan a hlutzia a hrechiang ta hle mai. A dairy-ah chuan, ‘Thomas A. Edison chu rilru lama harsatna nei a ni a, nimahsela a nuin mi ropui takah a siam a ni’ tiin a ziak ta nghe nghe a ni.

 

   Tumkhat chu elictric bulb siamchhuah tumin a thawhpuite nen chuan an bei chiam mai a, enchhinna hrang hrang vawi 10,000 chuang an neih tawh hnuah pawh an la hlawhtling thei der mai si lova, midang chu beidawng dawn angin lang mah sela beidawn a tum hauh lo thung. A tawp a tawpah chuan an hlawhtling ta hram a, news reporter pakhat chuan kawmin, vawi 10,000 hlawhchham hnua han hlawhtlin tak chu eng nge a an a han zawh chuan, ‘Vawi 10,000 ka hlawhchham a ni lo, nimahsela kawng 10,000 chhawr theihloh ka hrechhuak a ni’ tiin a chhang thung a ni.

 

      Microphone, telephone receiver, universal stock ticker, phonograph, kinetoscope, storage battery, electric pen leh mimeograph bakah thil tamtak hmuchhuakin, khawvel hian a tangkaipui takzet a; a hlawhtlinna hi a tumruh vang ni tho mah se, a nu hmangaihna leh fuihna hi atan chuan a hlu hle bawk awm e.